-::اختــــــــلاف::-

1. بره لو ضحكت في وش حد و انت ماشي في الشارع هيضحكلك (كنوع من انواع السلام يعني ) ... هنا علطول هيقول استغفر الله العظيم مش طالبه هبل عالصبح
2. بره لو عملت لاي حد اي حاجه بسيطه جدا هيقولك شكرا .. حتى لو كان وزير و انت مالكش لازمه ... هنا لو حد قالك شكرا يبقى اكيد عايز منك حاجه .
3. هناك في مساواه بين الرجل و المرأه .. الست بتخش الجيش و بتشتغل ظابط و بتطلع مأموريات زيها زي اي راجل ... هنا يا عيني الستات مظاليم .. يا دوب ليهم عربيتين بس في المترو مخصصين للستات .. بس اتعينوا قاضيات برضه مش بنهزر احنا
4. برا لو كنت متخصص في حاجه هيبقى ليك تمن غالي أوي ... هنا لو اتخصصت في حاجه .. سواء هنا او برا مش هيبقى ليك اي تمن
5. برا انت بني ادم ... هنا الموضوع محتاج شوية جهد زياده .. عشان في احتمال كبير تبقى نص بني ادم .
6. برا بتشتري عربيه عشان توفر وقت المواصلات ... هنا بتشتري عربيه عشان يبقى اسمك كزا اللي معاه العربيه الفلانيه .. و لو حظك حلو ممكن تلاقي مكان تركن فيه و تاخد تاكسي .
7. برا بتشتغل عشان تاخد فلوس ... هنا بتدفع فلوس عشان تشتغل .
8. برا لو انت عارف حاجه الناس مش عارفاها بتشاركها مع الناس ... هنا لو انت مش عارف حاجه الناس مش عارفاها .. برضه بتشاركها مع الناس .
9. برا كل واحد عارف وضعه و امكانياته و بيتعامل مع الناس على اساسها و بيحاول يطور من نفسه ... هنا كلنا عباقره بس لو الزمن يدينا فرصه بس .
10. برا الانترنت من اساسيات الحياه ... هنا الانترنت من اساسيات الحياة الزوجية .. سواء للمتزوجين أو العزاب .
11. برا الترفيه بييجي بعد الشغل .. هنا الترفيه بييجي قبل الشغل .. و اثناء الشغل ... و بعد الشغل , هو احنا كفار عشان نشتغل 8 ساعات متواصل يا عم الحج !
12. برا هجيلك الساعه 8.5 يعني هجيلك 8.5 ... هنا هجيلك الساعه 8.5 .. يعني امتى برضه من الاخر ؟
13. برا بترفع قضيه على مواطن زيك عشان تاخد حقك بمساعدة الحكومه ... هنا بترفع قضية مع واحد مواطن زيك على الحكومه عشان تترموا في المعتقل انتوا لاتنين .
14. برا معدل قرائة المواطن كتاب في الاسبوع ... هنا معدل قرائة المواطن 50 فاتورة في الاسبوع .
15. برا بتتجوز عشان تستمتع مع شريك حياك ... هنا بتستمتع بحياتك على قد ما تقدر عشان في اخرتها لازم هتتجوز !
16. برا الناس بتسمع مزيكا عشان تروق و تسترخي ... هنا الناس بتسمع مزيكا عشان في واحد بيدور على نفسه و مش لاقيها ! ده غير انه لقى نمله ديلها طويل .
17. برا الأطفال بتتعلم فيزياء و رياضه 2 في اولى اعدادي ... لكن برضه الطفل المصري هو أزكى طفل في العالم .
18. برا المجتمع منفتح جدا .. ممكن جدا بنتك تجيب البوي فريند بتاعها البيت .. هنا المجتمع منغلق جدا .. وبرضه ممكن جدا بنتك تجيب البوي فريند بتاعها البيت .. الفرق في حجم القرطاس .
19. برا المعادله بسيطه جدا .. اتعب هتتقدر و هتعيش عيشه فل .. هنا برضه المعادله بسيطه جدا ... اتعب ... اتعب ... اتعب ... اتعب ... اتعب ... اتعب ......
20. برا ممكن تسجن ظابط مرور عشان اداك مخالفه غلط ... هنا ممكن تتسجن عشان ظابط مرور .. هو عايز كده يا اخي !
21. برا الناس بتشتري الموبايل لما بتكون محتاجاه ... و هنا برضه الناس بتشتري الموبايل عشان محتاجاه جدا ... من حق كل مواطن يسمع رنته باسم حضرته .
22. برا الشباب هما بناة المستقبل ... هنا برضه الشباب هما بناة المستقبل .. بس مفيش مونة .
23. برا الناس بتستخدم الايميل في الشغل عشان حاجات مهمة جدا ... هنا الناس بتستخدم الايميل عشان تسمع خبر حلو بعد ما تبعت الرساله لالف واحد .
24. برا الناس بتثور عشان الديمقراطيه ... هنا بنثور عشان ماتش الاهلي و الزمالك احتمال ما يتزعش عالتليفزيون .. الله ما هي دي ديمقراطيه برضه !
25. بره في حراك سياسي .. هنا ... هههههههههههههههههههههههههههههههههههههههههههههههههههههههههههههه
26. برا الحكومه بتصرف عليك لو بقيت عاطل ... هنا انت بتصرف عالحكومه سواء كنت عاطل أو .. أو ايه مانت اكيد عاطل !
27. برا الاخلاق انعدمت يا بيه ... البت بتبوس صاحبها قدام ابوها ... هنا الاخلاق عال يا بيه .. البت في السابع و بتصلي استخاره عشان تقرر تقول لابوها و لا لأ ..
28. برا الشوارع نضيفه و الجمال في كل مكان حواليك ... هنا الشوراع حقيره ... لكن جمال برضه في كل مكان حواليك !
29. برا عشان تتدخل كلية الطب الكليه بتمتحنك تشوفك مؤهل تبقى دكتور و لا لأ .. هنا عشان تتدخل كلية الطب لازم تجيب 50 من 50 في الانجليزي .. الله ! امال هتكتب الروشتات ازاي يا بيه !
30. برا الفاشل بيعرف انه فاشل و بيحاول يلاقي حل لنفسه ... هنا الفاشل مفيش قدامه حل الا الكلام عن الكوسه و مشتقاتها .
31. برا الفلوس بتتصرف على اساسيات الحياه و بعدين الترفيه ... هنا مفيش فلوس تتصرف اساسا ..بس فودافون مؤخرا رخصت سعر الدقيقة ... فيه امل ان شاء الله .
32. برا الناس متربيه عالغالي ... هنا برضه "الغالي" مربي الناس .
33. برا الدكتور بياخد الافات مؤلفه في اول حياته ... هنا برضه الدكتور بياخد الافات مؤلفه في بداية حياته .. مع فرق بسيط في اعتبار سن الخمسين هو مقتبل الحياه .
34. برا المهندس بيتخصص من اول سنه في الكليه ... هنا برضه هندسه مليانه تخصصات .. بس في الاخر .. انت مهندس .. هتنطط و لا ايه يا بشمهندس شفلك ورقه و قلم كده و ارسملك عماره و لا حاجه .
35. برا الشهاده تسوى فلوس كتير في ايدك ... هنا فلوس كتير من جيبك تسوى الشهاده .. بغض النظر عن سعر البرواز .
36. برا للزكاء و العبقريه معنى .. هنا برضه للزكاء و العبقريه معنى .. زي التنطيط و الفزلكه .
37. برا هتخترع و هتجدد هيبقى ليك قيمه ... هنا هتخترع و هتجدد ؟ انت هتهزر ؟
38. برا طالب الدراسات العليا بيشتغل في ماكدونالدز عشان يقدر يوفر مصاريف السكن ... هنا العاطل يرفض هذا الموقف المهين .. امال الكوسه دورها ايه في حياة الشاب مننا ؟؟
39. برا الخريج الجديد بيكتب في السي في مؤهلاته ... هنا الخريج الجديد بيكتب مؤهلاته + قرايبه المهمين .. و هو ده اهم جزء .
40. برا الناس بتطبق كتير من تعالم دينا ... هنا برضه بنطبق كتير من تعاليم دينا ... الا هو السالف حرام و لا حلال في صلاة الجمعه ؟
41. برا الناس بتصحى من النجمه عشان وراها شغل ... هنا الناس بتصحى من النجمه عشان تلحق جدول الطوابير .. و ممكن تلحق تروح الشغل .
42. برا الناس بتضحك عشان سعيده ... هنا الناس بتضحك بدل ما تموت من السعاده !
43. برا هتشتغل مديرك هيقدرك ... هنا هتشتغل مديرك هيسرق شغلك .. و بعدين يقدرك .. ماتخفش .
44. برا هتزاكر هتنجح هتشتغل ... هنا مش هتزاكر هتنجح مش هتشتغل .
45. برا لو سرقت افكار حد ممكن تدخل السجن ... هنا لو سرقت افكار حد .. ممكن جدا تسجن صاحبها .. علي صوتك و اتعلم من مرتضى يا اخي .
46. برا مفيش مرتضى منصور و شوبير !!!!
47. برا عشان تبقى ممثل مشهور لازم يبقى عندك موهبه جامده .. هنا ممكن تشتغل جمعتين في محل جزاره و هتلاقي فرص كتير .
48. برا عشان تبقى مطرب مشهور لازم يبقى صوتك حلو و الحانك جباره .. هنا الموضوع بسيط .. اشرب سيجاره بني و شارك تجربتك مع الشعب .
49. أخيرا ... برا بالمعدول ... هنا بالمقلوب .

باركولي ياناس انا فتحت مدونة تانية

أفكـــار سريعة

مش سامع حد بيبارك يعني ؟؟

هو في حد اساسا ؟؟

انا سامع صدى صوت !! لا حول الله يا رب

الدنيا بتضحك ليه كده من غير سبب ؟؟
يا للعجب !!

صوت الكمان دخل فجأه نطاق المكان
و بنت حلوة بتعزف خدت قلبي و طارت
و نسمة صيف في الجو دارت
كتبت كلمة انسجام

طب الدنيا بتضحك ليه كده من غير سبب ؟؟
يا للعجب !!

سامع صوت عود و لو انه مش موجود
و على غير العاده العود فرحان
و صاحبنا نازل جري في الالحان
الحان بترقص و تتنطط كما الاطفال
اشي غربي و اشي شرقي على حبة من متقال

نفسي أعرف الدنيا بتضحك ليه من غير سبب ؟؟
ياللعجب !!

و نور ابيض ساطع لون الفرح
فجأه انتشر و حاوطني لما قلبي انشرح
و صور مبدعة الوانها قوس قزح
و كنز الضحك المختفي ظهر و انفتح !

يعني ليه الدنيا بتضحك من غير سبب ؟؟
يا للعجب !
بدون تفسير .. كله بدون تفسير
شيء محير .. شيء غريب
شيء مالوش مثيل و لا ليه تقريب
شيء يدعو للعجب

الدنيا بتضحك ليه من غير سبب ؟؟

قعدتنا سوا معدتش بتوحشني ..

أصل كل حاجه حاجه اتغيرت

كانت علاقتنا زي ما بيقولوا صحية

بس دلوقتي .. حالتها اتدهورت

كان في ما بينا ضحكة مرح

كان في ساعات اوقات زعل

تقدر تقول الزكريات اتبعترت

يوم شمال و يومين يمين

بس اللي الباقي في الكتاب

صورة لوشوش غابت و اتفرقت

ساعات افتكرها ادور عليها و اسأل عنها

بحاول امشي طريقها يمكن توصلني لايام زمان

يمكن في لحظة غلط ننسا الحقيقة و نرجعلها

يمكن ننسى السواد اللي غمسنا قلوبنا فيه

و ننسى الكبر و الاوهام

و ننسى الفلوس و العربية و عيشة الافلام

و حاجات كتير عمرنا ما هنوصلها

يمكن ننسى و نبطل نصدر على بعض أحكام

و ما يهمناش غير لحظة حلوة في قعدتنا سوا

و نغني مع بعض ياليل و زي الهوا

و على شط بحر المرسى نحلم بالفلوس و العربية و عيشة الافلام

بس احنا برضه لسه في نفس المكان

كلها أحلام يا صاحبي .. كلها أحلام

لا عمر الزمان هيرجع اوقات زمان

و لا عمر الأمور اتبدلت

و قعدتنا سوا .. صعب توحشني ..

صعب الاقيها اتزيفت

لما الكل يعاملك على انك مجنون ..

مجنون بجد مش هزار .. و تلاقي اللي بيهزلك راسه بالموافقه و انت بتتكلم و اول ما تبعد عنه يموت من الضحك و يحكي نوادرك مع ناس تانيه

و تلاقي اللي عنده كتير من قلة الادب و تلاقيه بيضحك و بيتريق عليك في وجودك

و تلاقي اللي بيعطف عليك و بيكتم التريقه او الضحك جواه لانك ياعيني مجنون و فيك اللي مكفيك

و تلاقي اللي بيتجاهل كلامك تماما و في اول فرصة متاحة ليه انه يغير الموضوع بيغيره عشان يتكلم عن مواضيع كتير عاقلة (من وجهة نظره)

و تلاقي اللي ممكن يشتمك (هو كده لمجرد ان الكلام مش عاجبه ) .. و تلاقي اللي ممكن يقطع علاقته بيك فعليا لكن يسيبها شكليا لانه مش قادر يقولك انا معتش بحب قعدتك و لا كلامك لانك مجنون

و تلاقي اللي من جواه مقتنع بكلامك لكن مش قادر يصارح نفسه او خايف يلاقي نفس مصيرك فابيركب الموجه و ينضم لفريق (العاقلين)

و تلاقي اللي بيجي يعتزرلك في يوم من الايام عن اسائته و بعد يومين ما يقدرش يقاوم و يرجع يقطع فيك تاني

و تلاقي اللي بيهددك انه هيطلع للناس و يقول انت اد ايه مجنون !!

و تلاقي اللي مصدق انك فرحان ان الناس بتعاملك كده فابيشارك في صناعة فرحتك كل يوم بهدية من الهدايا السابق ذكرها .. !

يمكن عشان انت كنت في يوم من الايام مجنون فعلا ؟

يمكن كلامك مش على هواهم ؟

يمكن احتمالات كتير ..

بس اللي أكيد .. ان الناس دي نسيت انك انسان

و ده نتيجة لأكبر غلطة عملتها في حياتك
لما رفضت تدخل مستشفى المجانين !!

مرة من المرات كنت كاتب موضوع في المدونة هنا و لما سألت واحد صحبي عن رأية فيه قالي

أنا استحقرت الموضوع اساسا وحسيت انه احقر من اني اعلق عليه

و لو ان الموضوع ده من زمان اوي الا اني مش قادر افهم لغاية دلوقتي يعني ايه هو استحقر الموضوع لانه مش متفق معاه
بالرغم ان "الموضوع" ماهانوش باي شكل من الاشكال لا شخصيا و لا دينيا و لا مجتمعيا و لا بطيخيا و لا اي حاجه

هل ده نوع من انواع الضعف الفكري ؟؟ زي لما حد يديك مسألة رياضيات صعبة و انت مش عارف تحلها تقوم تقول للي ادهالك انت انسان معقد اساسا و تسيبه و تمشي و انت من جواك بتغلي عشان مش قادر تحلها ؟؟

هل لما حد بيقولنا موضوع احنا مختلفين معاه كده غلاسه من غير اي منطق فكري بنتشنج و نتعصب و احيانا بنشتم الشخص اللي بيقولنا الكلام او بنسفه كلامه لاننا في الحقيقة مش قادرين نرد عليه .. او على الاقل مش قادرين نفهمه ؟؟

و لا ده نوع من انواع الغرور المدفون جوانا ان كل واحد فينا بيعتبر نفسه عبقري زمانه و ان اي رأي مخالف ليه يبقى صادر عن واحد اقل منه خبرة و اقل ادراك للحياة .. عشان كده بنعتبر ان اي حد يتجرأ يختلف معانا في الرأي يبقى بيهينا .. كاننا دكتور في الجامعه و واحد لسه في سنة اولى جاي بيقولنا .. على فكره انا افهم عنك

و لا ده نوع من انواع الخوف من التغيير او القرف من التغيير بمعنى اصح .. لان الشخص المختلف معانا لو طلع صح هيبقى لازم نغير قيم و افكار كتير احنا عايشين عليها و مرتاحين و ميت فل و عشرة , و احنا مش فاضيين نغير بصراحة .. عشان كده بنشتمة او بنسفه كلامه كنوع من انواع الدفاع البدائي كاننا نايمين و مرتاحين و واحد غلس جاي يصحينا من النوم .. حتى لو كان الانسان الغلس ده بيصحينا عشان معاد مهم او حاجه لمصلحتنا

و لا ده نوع من انواع العناد الغبي عشان مينفعش ننهزم فكريا ابدا لاننا فاهمين غلط اننا لما بننهزم فكريا ده معناه اننا اغبياء او متخلفين عقليا .. و ما نعرفش انه العباقره و المبدعين بس هما اللي ما بيلاقوش اي مشكلة انهم ينهزموا فكريا عشان يوصلوا لافكار احسن و اجمل و اكثر صحة

احتمالات كتير ممكنه الا احتمال واحد ..اننا لما بنشتم اللي بيختلف معانا في الرأي او بنسفه كلامه بيكون معانا حق

لانه مهما كان اللي مختلف معانا غلط .. مظنش ابدا ان استحقار كلامه او اهانته شخصيا هيقوي موقفنا باي حال من الاحوال

بالعكس .. ده اكبر دليل اننا محتاسين و في ورطه و مش عارفين نخرج منها .. لانه ببساطه لو كان عندنا وجهة نظر ثاقبه و صحيحة مية في المية زي ما بندعي

كلنا قلناها بهدوء و سكتنا بيها التخين!!

انما انتوا مش ناويين تتقبلوا الاخر بقى ولا ايه