-::اختــــــــلاف::-

ليه ديما بتبص للناس و تقول هي الناس بقت عامله كده ليه ؟؟
و انت مالك يا اخي ؟؟

ليه ديما بتبص للناس اللي "مش مثقفين" للي مش مهتمين بالقراءه و مش مهتمين باحوال البلد وعايشين كما اتفق و تقول هي الناس دي عايشه ازاي .. دول لازم يتعدموا او شوفولهم حل !؟؟
كل ده عشان تقول لنفسك انا حلو اوي و مثقف اوي و واعي اوي
جتك نيلة

ليه ديما بتبص على الناس العواطليه اللي قاعدين عالقهاوي و تقول ايه العالم الفاشله دي
كل ده عشان تقول لنفسك انا حلو اوي و شغال و مجتهد
يا قلب امك

ليه ديما بتعيب على هدوم الناس و تقول عليهم بيئه و فلاحين .. او يمكن تقول عليهم شباب سيس
كل ده عشان تحس انك واد حلو و شيك و مظبط نفسك
يا روح طنط

ليه ديما بتتريق على اي و كل حاجه تقابلك مش على هواك
كل ده عشان من جواك تحس انك احلى و أحسن

تصدق انك صعبت عليا

تعرف ليه ؟

لان كل اللي انت بتنتقدهم دول .. مرتاحين من جواهم و عايشين أحسن منك مليون مره
و مش محتاجين نصايحك الذهبيه

احداث كتير اوي بتحصل و لا حد هامه اي حاجه
تفتكر انت كده برضه ... محدش هامه اي حاجه بتحصل؟؟

تفتكر انك لما تعيا و الناس تتصل بيك عشان تطمن عليك ده بيبقى بجد ؟
صدقني دي تقضية واجب .. خد مني بس

تفتكر لما بتبقى زعلان و حد بيقولك مالك زعلان من ايه بيبقى مهتم اوي يعني ؟؟
و لا برضه بيبقى تقضية واجب .. او ممكن فضول .. او ممكن عشان انت ساكت و هو مش لاقي حاجه يقولها ؟

تفتكر و انت بتتكلم اللي جنبك بيسمعك فعلا و لا بيبقى بيحاول يعرف يا ترى المعدن اللي ماسكه في جيبه ده جنيه و لا نص ؟

تفتكر ابوك لما بيطمن عليك بيقى عايزك توصل للي انت عايزه فعلا و لا عايز يطمن نفسه انه ربى ابنه احسن تربيه و عمل اللي عليه ؟

تفتكر حبيبك بيبقى خايف عليك فعلا و لا خايف على نفسه لحسن يعيش في كئابه من غيرك ؟

تفتكر حد مهتم انت بتحلم بايه و نفسك توصل لايه و لا المهم ان احلامك و ارائك دي تبقى على هواه ؟؟
تفتكر حد بيفكر اصلا هي على هواه و لا لأ ؟؟

تفتكر حد بيهتم بحاجه غير نفسه ؟؟

تفتكر هيبقى حلو لو حد اهتم بيك ؟؟ هيحصل فرق من اي نوع يعني ؟؟
تفتكر ان ده من طباع البني ادمين اصلا ؟؟
ماعتقدش

تفتكر انت مهتم اصلا بالكلام اللي انت بتقراه ده ؟؟ اقولك انا
نص جنيه هاتلك حاجه حلوه