-::اختــــــــلاف::-

قعدتنا سوا معدتش بتوحشني ..

أصل كل حاجه حاجه اتغيرت

كانت علاقتنا زي ما بيقولوا صحية

بس دلوقتي .. حالتها اتدهورت

كان في ما بينا ضحكة مرح

كان في ساعات اوقات زعل

تقدر تقول الزكريات اتبعترت

يوم شمال و يومين يمين

بس اللي الباقي في الكتاب

صورة لوشوش غابت و اتفرقت

ساعات افتكرها ادور عليها و اسأل عنها

بحاول امشي طريقها يمكن توصلني لايام زمان

يمكن في لحظة غلط ننسا الحقيقة و نرجعلها

يمكن ننسى السواد اللي غمسنا قلوبنا فيه

و ننسى الكبر و الاوهام

و ننسى الفلوس و العربية و عيشة الافلام

و حاجات كتير عمرنا ما هنوصلها

يمكن ننسى و نبطل نصدر على بعض أحكام

و ما يهمناش غير لحظة حلوة في قعدتنا سوا

و نغني مع بعض ياليل و زي الهوا

و على شط بحر المرسى نحلم بالفلوس و العربية و عيشة الافلام

بس احنا برضه لسه في نفس المكان

كلها أحلام يا صاحبي .. كلها أحلام

لا عمر الزمان هيرجع اوقات زمان

و لا عمر الأمور اتبدلت

و قعدتنا سوا .. صعب توحشني ..

صعب الاقيها اتزيفت

لما الكل يعاملك على انك مجنون ..

مجنون بجد مش هزار .. و تلاقي اللي بيهزلك راسه بالموافقه و انت بتتكلم و اول ما تبعد عنه يموت من الضحك و يحكي نوادرك مع ناس تانيه

و تلاقي اللي عنده كتير من قلة الادب و تلاقيه بيضحك و بيتريق عليك في وجودك

و تلاقي اللي بيعطف عليك و بيكتم التريقه او الضحك جواه لانك ياعيني مجنون و فيك اللي مكفيك

و تلاقي اللي بيتجاهل كلامك تماما و في اول فرصة متاحة ليه انه يغير الموضوع بيغيره عشان يتكلم عن مواضيع كتير عاقلة (من وجهة نظره)

و تلاقي اللي ممكن يشتمك (هو كده لمجرد ان الكلام مش عاجبه ) .. و تلاقي اللي ممكن يقطع علاقته بيك فعليا لكن يسيبها شكليا لانه مش قادر يقولك انا معتش بحب قعدتك و لا كلامك لانك مجنون

و تلاقي اللي من جواه مقتنع بكلامك لكن مش قادر يصارح نفسه او خايف يلاقي نفس مصيرك فابيركب الموجه و ينضم لفريق (العاقلين)

و تلاقي اللي بيجي يعتزرلك في يوم من الايام عن اسائته و بعد يومين ما يقدرش يقاوم و يرجع يقطع فيك تاني

و تلاقي اللي بيهددك انه هيطلع للناس و يقول انت اد ايه مجنون !!

و تلاقي اللي مصدق انك فرحان ان الناس بتعاملك كده فابيشارك في صناعة فرحتك كل يوم بهدية من الهدايا السابق ذكرها .. !

يمكن عشان انت كنت في يوم من الايام مجنون فعلا ؟

يمكن كلامك مش على هواهم ؟

يمكن احتمالات كتير ..

بس اللي أكيد .. ان الناس دي نسيت انك انسان

و ده نتيجة لأكبر غلطة عملتها في حياتك
لما رفضت تدخل مستشفى المجانين !!

مرة من المرات كنت كاتب موضوع في المدونة هنا و لما سألت واحد صحبي عن رأية فيه قالي

أنا استحقرت الموضوع اساسا وحسيت انه احقر من اني اعلق عليه

و لو ان الموضوع ده من زمان اوي الا اني مش قادر افهم لغاية دلوقتي يعني ايه هو استحقر الموضوع لانه مش متفق معاه
بالرغم ان "الموضوع" ماهانوش باي شكل من الاشكال لا شخصيا و لا دينيا و لا مجتمعيا و لا بطيخيا و لا اي حاجه

هل ده نوع من انواع الضعف الفكري ؟؟ زي لما حد يديك مسألة رياضيات صعبة و انت مش عارف تحلها تقوم تقول للي ادهالك انت انسان معقد اساسا و تسيبه و تمشي و انت من جواك بتغلي عشان مش قادر تحلها ؟؟

هل لما حد بيقولنا موضوع احنا مختلفين معاه كده غلاسه من غير اي منطق فكري بنتشنج و نتعصب و احيانا بنشتم الشخص اللي بيقولنا الكلام او بنسفه كلامه لاننا في الحقيقة مش قادرين نرد عليه .. او على الاقل مش قادرين نفهمه ؟؟

و لا ده نوع من انواع الغرور المدفون جوانا ان كل واحد فينا بيعتبر نفسه عبقري زمانه و ان اي رأي مخالف ليه يبقى صادر عن واحد اقل منه خبرة و اقل ادراك للحياة .. عشان كده بنعتبر ان اي حد يتجرأ يختلف معانا في الرأي يبقى بيهينا .. كاننا دكتور في الجامعه و واحد لسه في سنة اولى جاي بيقولنا .. على فكره انا افهم عنك

و لا ده نوع من انواع الخوف من التغيير او القرف من التغيير بمعنى اصح .. لان الشخص المختلف معانا لو طلع صح هيبقى لازم نغير قيم و افكار كتير احنا عايشين عليها و مرتاحين و ميت فل و عشرة , و احنا مش فاضيين نغير بصراحة .. عشان كده بنشتمة او بنسفه كلامه كنوع من انواع الدفاع البدائي كاننا نايمين و مرتاحين و واحد غلس جاي يصحينا من النوم .. حتى لو كان الانسان الغلس ده بيصحينا عشان معاد مهم او حاجه لمصلحتنا

و لا ده نوع من انواع العناد الغبي عشان مينفعش ننهزم فكريا ابدا لاننا فاهمين غلط اننا لما بننهزم فكريا ده معناه اننا اغبياء او متخلفين عقليا .. و ما نعرفش انه العباقره و المبدعين بس هما اللي ما بيلاقوش اي مشكلة انهم ينهزموا فكريا عشان يوصلوا لافكار احسن و اجمل و اكثر صحة

احتمالات كتير ممكنه الا احتمال واحد ..اننا لما بنشتم اللي بيختلف معانا في الرأي او بنسفه كلامه بيكون معانا حق

لانه مهما كان اللي مختلف معانا غلط .. مظنش ابدا ان استحقار كلامه او اهانته شخصيا هيقوي موقفنا باي حال من الاحوال

بالعكس .. ده اكبر دليل اننا محتاسين و في ورطه و مش عارفين نخرج منها .. لانه ببساطه لو كان عندنا وجهة نظر ثاقبه و صحيحة مية في المية زي ما بندعي

كلنا قلناها بهدوء و سكتنا بيها التخين!!

انما انتوا مش ناويين تتقبلوا الاخر بقى ولا ايه

لو كنت شفت فيلم طير انت وفر وقتك و ماتقراش

؟ Alpha Male سمعت عن الــ
في حالة لو مكنتش تعرفه الالفا ميل ده الدكر اللي شخصيته جزابة و شكله جامد من فصيلة براد بيت كده و عنده كاريزما و قدره على الاقناع و كل الافشخانات دي
و في حالة كنت عارف المعنى ده أو ماتعرفوش .. صدقني في احتمال كبير أوي انك في مرحلة من مراحل حياتك أكيد حاولت جاهدا انك تكون ألفا ميل .. أكيد حاولت تبقى شخصية جزابة و حاولت انك تحسن من شكلك على قد ما تقدر و حاولت و حاولت و حاولت.. و ممكن تكون نجحت و بقيت الفا ميل بالصلاة على جمال النبي حارسك .. أو ( و ده الاحتمال الأكبر ) فشلت و بصيت لنفسك في المرايه لقيت ان انت هو انت
لا انت الفا ميل و لا حصلت هوت ميل حتى ( معلش سامحوني القافيه حكمت ومقدرتش أقاوم ) .. المهم

و في الحالة التانية دي أسمحلي أهنيك .. انت من البني ادمين الطبيعين

انا مش معترض ابدا ان كل الواحد يحاول يطور من نفسه لحد ما يموت ..
لكن اعتراضي كل اعتراضي ان التطوير ده يكون لصورة محفوظة كلنا عارفينها و زهقنا منها

ممكن ما تكونش الفا ميل .. عادي جدا .. لكن صدقني ممكن تكون كاتب موهوب اوي و ساعتها هتأثر في ناس أكتر بأفكارك !

ممكن ماتكونش الفا ميل بس تكون انسان طيب و متفاهم و مش شرط تبقى ديما مركز الاهتمام .. و ساعتها هتكسب ناس أكتر .. و الناس هتحبك أكتر و أكتر !

ممكن ماتكونش الفا ميل و مايكونش عندك كاريزما بس تكون بتسمع كويس للناس .. ساعتها الناس هتجري وراك تحكيلك و تشكيلك و تاخد رأيك ..

ممكن ما تكونش الفا ميل و مايكونش شكلك حلو . ممكن يكون شكلك جزمة قديمة .. بس عقلك يوزن بلد ..

من الاخر كفاية بقى صدعتونا .. شخصية جزابة و كاريزما و شكل حلو و و و
ياما ناس كده .. عملنا بيهم ايه ؟؟

ممكن تقول ان كوني مش الفا ميل خالص فانا حقود .. ممكن يكون عندك حق .. بس صدقني
مش فارقه معايا
عشان انا عجباني نفسي كده .. و يا ريت اي حد زيي كده يفكوا من الحوارات الفاشله دي و يشوف هو هيعمل ايه في حياته بجد
من غير ما يبقى الواد المخلص .. الالفا ميل

ساعات كتير بنكون صح أوي ... و كل اللي حوالينا يشاورو علينا و يقولوا ده أكبر غلط
يمكن غيرانين ؟؟ يمكن مش عارفين الصح من الغلط ؟ يمكن بيفتوا ؟؟ الله أعلم

انما ساعات كتير أوي بنعمل أغبى الحاجات اللي في الدنيا ... و كل اللي حوالينا يسقفوا و يقولوا الله
يمكن عاجبهم حالنا المايل ؟؟ يمكن مش عارفين الصح من الغلط ؟؟ يمكن بيفتوا ؟؟ الله أعلم

انما عمرنا ما نلاقي اللي يقف معانا و كلامه ينورلنا الطريق
ديما الكلام .. فارغ
ديما النصيحة .. مالهاش معنى
ديما وجودهم تقل مش فايده

ساعات كتير اوي بنفتكر ناس انهم اخر اسباب الفرح اللي هنعرفها في حياتنا
و غالبا بيطلعوا سبب لنوبة الاكتئاب الجاية

انما عمرك ما تلاقي حد سبب لنوبة فرح .. ديما الفرح من جوانا
و غالبا الفرح نادر .. عشان ديما ما بنتعلمش و مستنينه من ناس برا

ساعات بنحلم احلام فوق طاقتنا .. و نكون فاكرينها أحلام بسيطه
و غالبا بنكتشف ان تفكيرنا هو اللي بسيط .. و اننا مش فاهمين نفسنا صح
و لا فاهمين احلامنا اد ايه صعبة .. و في نفس الوقت مفيش اسهل منها

الدنيا مطر و ريحة المطر أموت أنا فيها
برد و غيم السما بس حاجه عجباني فيها
يمكن تكون حالة فرح بدون تفسير .. يمكن تكون ضحكة غريق في اغمق بير
بس المهم الدنيا طايره و انا طاير فوقيها

كمان يومين أرجع حزين و الحزن له جبروت
شمس و دفا السما بس حاجات جوايا بتموت
يمكن تكون حالة حزن بدون تفسير ... يمكن تكون دمعة في موكب الحزن الأخير
بس المهم الدنيا واقفة و انا مش مبسوط
!

ديما لما بقعد مع حد و يفضل يحكيلي عن زكرياته بحس بملل رهيب .. الا ازا كان الشخص ده أبويا أو أمي او حد من صحابي التلاته .. غير كده ببقى عايز اشوط اللي بيتكلم برجلي و طول مانا قاعد عمال اتخيل في دماغي اني بديله بالقلم او بغرس سكينه في صدره او بكب عليه مية مغليه .. و تفضل التخيلات لحد ما يخلص كلامه

الغريبه اني قليل اوي لما بقرر اني احكي لحد زكرياتي .. بس انا قررت النهارده اني افتح لخيالكم المجال شويه .. طبعا عارفين عشان ايه

بداية هجاوب على السؤال اللي بيقتلكم من الفضول ( انا معرفش انتوا مين اللي انا عمال اكلمهم دول اساسا .. ده انا بقالي 3 سنين محدش علقلي على تدوينه .. و انا فاتح المدونه من سنتين اصلا) و هو ليه انا هحكي زكرياتي

حكمت عليا الظروف اني اقضي الفتره دي من حياتي في البيت .. أيوه في البيت , قاعد 24 ساعه قدام الكمبيوتر .. بدون دخول في تفاصيل ممله ( قال يعني التدوينه مشوقه اوي ) انا من الاخر كده الوحده متجسده في بني ادم
مبكلمش حد و محدش بيكلمني ... مبسألش على حد و لا حد بيسأل عني ( ده رد فعل طبيعي ) .. بس طبعا كله باختياري

دلوقتي بس بفتكر مواقف عمري ماكنت اتخيل في يوم من الايام انها هتوحشني .. لكن الغريب انها وحشاني بشكل مش طبيعي و حاسس انها كانت احلى اوقات حياتي

ايام ما كنت بنزل اتمرمط عشان الاقي مواصله للجامعه .. ياااه و انا لسه صاحي من النوم و نازل و الشمس جميله و ناس كتير حواليا و اسلم على ده ( و اشتمه في سري بعدها مش مهم بس المهم ان في حد بسلم عليه ) و اتكلم مع ده و اهزر مع ده .. و نفضل واقفين للضهر مفيش مواصلات يا اما نركب خمسات في كرسي واحد .. كل ده دلوقتي جميل اوي

ايام ما كنت بقعد في المحاضره و انا هموت من الملل و ابدا حوار بالاشاره مع اي حد و نقعد نضحك و نحاول ننزل تحت البنش عشان محدش ياخد باله

و لا ايام ما كنا بننزل كل يوم بالليل انا و صحابي ع القهوه .. ايام ممله مفيهاش جديد و ايام بنضحك و ايام بنتخانق .. بس في احداث بتحصل كل يوم بالليل من الساعه 8 لحد 2 - 3 بالليل

و لا لما اكون خلصت المحاضرات كلها خلاص و انا مش ورايا اي حاجه و نفضل قاعدين في الجامعه مع ناس كلهم وحشني

و لا لما اجي ارجع بقى و الاقي الدنيا كلها مرصوصه قدام الموقف .. اللحظات دي على قد ما كانت متعبه ساعتها بس كان بيحصل فيها مواقف كتير اوي بقت زكريات حلوه دلوقتي

و لا لما كنت اخد واحد صحبي كده هو في بلاد الحجاز دلوقتي و نروح مكان كده اسمه عيد ورا الجامعه .. مكان موبوء و مقرف المفروض انه قهوه شعبيه.. بس كان جميل .. محدش يسألني ليه ( ده لو في حد لسه مكمل لحد هنا ده يبقى كتر الف خيره )

و حاجات كتييييييير
يااااااااااااااااااااااااااااااااااااااااااااااااااااااه
بجد كانت ايام جميله اوي .. لمجرد ان كان في ناس بحبهم بيشاركوني كل الاحداث دي

دلوقتي في احداث .. بس مفيش ناس
يعني و لا حاجه

-----------------------