ناس كتير بتعدي علينا .. كتير منهم بيأثروا فينا .. اسمهم بيلمع .. بنقول عليهم عباقرة , لكن نادر جدا منهم بيكون فعلا من النوع الأصلي مش المضروب .. النوع اللي هتفضل صورته عايشة للأبد .. زي المبدع الجميل أحمد زكي , النهادره ذكرى رحيل الراجل الجامد أوي ده .. ربنا يرحمه و يغفرله يا رب ..
أول مره شفت فيها ابداع الممثل ده كان فيلم "مستر كاراتيه" .. كنت صغير أوي و كان تاني يوم مدرسة و لازم أنام بدري .. وفاكر اد ايه يوميها أمي طلعت روحها عشان أدخل انام و بعد ما دخلت اتسحبت و رجعت اتفرج تاني .. اللي فاكره اني مكنتش مركز في قصة الفيلم على اد ما تفاصيل شخصية الراجل القروي البسيط ده شداني اوي (مع اني كنت صغير جدا .. و ده مش عشان انا الطفل المعجزه يعني .. دي عبقرية احمد زكي ) و مش هنسى ابدا مشهده لما كان واقف و راكن على الحيطه و بيحاول يقلد واحد من ولاد المدينة و بيقول لمدربه و هو بيشاور على البنطلون اللي لابسه .. "مش واخد بالك ولا ايه .. جينز من الامريكاني أهو" ! و الله لو جابوا ممثلين الدنيا العالميين كلهم ما حد هيقدر يطلع الجمله دي زيه أبدا ..
بعد كده بكام يوم شفت فيلم النمر الاسود .. و من ساعتها و أحمد زكي هو الممثل الرسمي لصورة البطل في دماغي ..
بعد كده عرفت ان الافلام دي ضمن سلسله ضخمه من الابداعات يعني دي اقل حاجه ممكن احمد زكي يعملها .. لو اتكلمت هقول ايه عن 55 فيلم و 3 مسرحيات و مسلسلين .. شلال من الابداع لا يتوقف ..
و الله احنا عندنا ممثلين ميقلوش أبدا عن ألباتشينو أو انتوني هوبكينز أو العالم دول كلهم .. أنا شايف صابع أحمد زكي الصغير برقابيهم كلهم .. على الأقل الراجل ده قدر يعمل حاجه وسط امكانياتنا المسكينة .. تخيلوا أحمد زكي بيمثل في هوليوود مثلا .. ده كان هيبقى مركز شباب الابداع الفني هناك !!
أخيرا .. أرفع القبعه احتراما و اعجابا بالممثل ده .. بجد واحشنا .. و بدعي ربنا من قلبي يرحمه و يغفرله ..
لو عايز تعرف أكتر عن أحمد زكي .. اضغط هنا
4 comments:
مش حنسى كلمتك ليا لما قولتلى عن محمد منير انه حيتعرف اكتر هو على ايه بعد ما يموت .. للأسف احمد زكى عبقرى زى ما قولت بس ما خدش حقه وهو عايش اد ما خده بعد ما مات .. مصر جواها عباقرة فى كل مجال بس الامكانيات زى ما قولت .. للأسف
فعلا الراجل ده مخدش حقه غير بعد مامات
انا بتهيالى ان هوه نفسه مكنش واخد باله انه ممثل عبقرى واسطره وعشان كده كان مبدع..ربنا يرحمه ويعوضنا عنه باسطوره تانيه تحاول تسد الفراغ الى سابه
عمري ما حسيت ان احمد زكي عبقري لا قبل ما يموت ولا بعد ما مات مش عارف ليه
غريبة يا د.وائل انت تقريبا الوحيد اللس سمعتة بيقول كده
عموما دي و جهة نظرك و ان كنت مختلف معاها تماما
يعني مثلا لما اتفرجت على ناصر 56 أو ايام السادات محستش ان تمثيل الراجل ده مختلف عن الكل ؟؟
مكنش بيقنعك أوي بالدور لدرجة ان صورة عبد الناصر أو السادات بقت مرتبطه أوي بالفيلمين في دماغك ؟؟
----------------------------------
شكرا على زيارتك و ياريت متكونش اخر
مرة
Post a Comment